عيال الأبلة

اتذكر مرحلة رياض الاطفال اللي كنت اقضيها ما بين قالت الأبلة وخالد وليد، طبعا بو وليد كان صديقي بالروضة الحميم لأن ما كان عندي صديقات بنات وكان عندي سالم ويوسف ومحمد وكانت بنت وحده اسمها هبه اذكر بيتهم عند راس العاير، على الشارع الرئيسي.

تعلمت بالروضه جميع الفنون الشعبية والسامري والليوه والنقازي هذا ابرز ما تعلمته وتعلمت القص واللزق وشلون ألعب بالطين وكانت مدرستي اسمها ايمان وايد حليوه يمكن عشان اهيه وامي بنات خالة، لالا اهيه كانت حليوة وايد.

كنا ناخذ سدارينا من الغرفة الداخليه علشان ناكل بالمطعم ونلاقيهم حاطين لنا حليب ككاو او موز او فراوله كي دي دي وتوسته وموزه، الحاصل ان كل طاوله قاعدين عليها اثنين ضعاف وواحد متين ليش؟!
لضعاف يشربون الحليب بس والمتين ياكل ميوتهم (فاكهتهم)وتوستتهم، ويصير صديقهم من الدرجه الثانية، كان سلوم اهوه متينا انا وخالد، وكنا ننطر اهالينا بصالة النشاط، كنا نعرف بعض بأسامينا بدون عوايل او سكن او وين او شلون، كنا نعيش اليوم لحظه بلحظة، واحلى شي الجذب اللي كانو يجذبونه علينا المدرسات في الحصة الاخيرة عشان يفتكون من قرقتنا.

كانوا يحطون بعيونا بنسلين ،والبنسلين الله خير من عين لي عين ، نفس العصار يفتر على الصف كلا جان في جرثومة ،رمد ،بوجليجل، ربو ، انفلونزا خنازير انتقلت، ويقولون لنا اللي يبطل عينه قبل لا يطق الجرس يصير مريض، عشان يفتكون من حنتنا ورنتنا بالحصة الاخيرة وخاصة اذا كان يوم اربعا.
الله الحافظ
ما يدرون ان احنا انبطل عينا نص تبطل عشان نشوف شيسوون، وكل السوالف طبعا عن الرياييل ويبين هالشي من اسلوب الحجي، قالي، حقرته، شسوي فيه،و......الخ.
طبعا احنا نسوي روحنا صمخان والأبلة المتزوجه عندنا مقياسها ان يكون بطنها كبير "يعني حامل" يعني اللي مو حامل مو متزوجه، مو الحين الكل بطنه كبير عدى الحامل!.
وحزتها كانت الوجبات السريعة ناكلها كل ويك اند، بعكس الوضع الحالي اللي بالويك اند بس ماناكل الوجبات السريعة، وطبعا لاتنسى صراخ الأبلات حق حفلة آخر السنه اللي انتدرب لها شهرين والدوام كلا 6 شهور شهر استقبال وشهرين دراسة بعدين نغيب ونشبك الغياب مع عطلة الربيع وبعدين نداوم شهرين انتدرب للحفله وعقب الحفله ما تلاقي ولا قطو بالروضه.
مادري شتعلمنا
المهم اني تعلمت ارقص واحفظ الغناوي الوطنية، ونسيت شغله مهمه تعلمتها.
الواسطة
لأن اذا الطفل ما كان ولد أبله ماكان يدش اي مسابقة الا اذا كان فلتت زمانه، اما اذا كان كودنه و امه ابله فكان يدش جميع الانشطة ويتكرم سبعين تكريم، وتلاقي عنده 50 مدالية، 14 درع وامه كشرتها من هنيه لي هنيه.
وكل محد قال لها شي قالت ولدي او بنتي.
يامال من يعطيج طراق انتي وولدج، قاهرينيييييييييييي!
شنقول بس ترى حجي الصج يشق القحفية، ولافات الفوت ماينفع الصوت.